Monday, January 15, 2018

ഒരു നുണക്കഥയിലെ തിമിംഗലം


ഞാൻ തിമിംഗലം,
വഴിതെറ്റി വന്നതാണു്
അറ്റ് ലാന്റിലേക്കു ചെല്ലാൻ
കടലലകൾ താണ്ടിയും
പിശറുകളെ ചെറുത്തും
ദിവസങ്ങൾ നീന്തുകയായി
അറബിക്കടലിലെത്തിയതു്
ദിശ തെറ്റി മാത്രമായിരുന്നു

ഒരു തുണിക്കടയുടെ
പച്ചയും , വെള്ളയും നിറമുള്ള
പ്ലാസ്റ്റിക് സഞ്ചികൾ
എനിക്കു വഴിമുടക്കികളായി
ടൈറ്റാനിയത്തിന്റെ വിഴുപ്പ്
തുറന്ന വായിലേക്ക്
അതിക്രമിച്ചു കയറി വന്നു
കരയിൽ അങ്ങു ദൂരെയായി
ദൈവത്തിന്റെ സ്വന്തം നാടിന്റെ
പച്ചപ്പ് കാണാമായിരുന്നു
എന്നിട്ടും ഒരു കൂട്ടം പത്രക്കാർ
പതിവു തെറ്റിക്കാതെ
നുണകളനവധി നിർമ്മിച്ചു
ചാളയും , കൊഞ്ചും കൊതിച്ചു
വന്ന തീറ്റക്കൊതിച്ചിയെന്നു്
ഒരു കൂട്ടരെഴുതിച്ചേർത്തു
കാമുകനെ തേടിത്തേടി
ഇണദ്ദാഹം തീർക്കനായി
മദിച്ചു വന്നതാണെന്നു്
മറ്റൊരു കൂട്ടരുമെഴുതി
കില്ലർ സ്രാവുകളെത്ര ഭേദം
വഴിയറിയാതെയുഴലുമ്പോൾ
കില്ലർസ്രാവുകളാണെനിക്കു
വഴി പറഞ്ഞു തന്നതു് .