Wednesday, December 15, 2010

അതിക്രമിച്ചു കടന്നവന്‍

                                 അതിക്രമിച്ചു കടന്നതാണ്
                                 തടയുന്നതിനോ
                                 അരുതെന്നു പറയാനോ
                                 ആരുമില്ലായിരുന്നു
                                 ശിക്ഷിക്കപ്പെടുമെന്ന
                                 മുന്നറിയിപ്പു പലകയും കണ്ടില്ല.
                             
                                 ആദ്യമമ്മയുടെയുദരത്തിലും
                                 അച്ഛന്റെ വ്യയങ്ങളിലും
                                 അതിക്രമിച്ചു കടന്നു
                                 പിന്നെയോരോ
                                കാലപരിധിയിലായി
                                കാമുകിയുടെ
                                സ്വാതന്ത്ര്യത്തിലും
                                ഇണയുടെ
                                സ്വകാര്യതകളിലും
                                തലമുറകളുടെ
                                ഇഷ്ടാനിഷ്ടങ്ങളിലേക്കും
                                അതിക്രമിച്ചു കയറി.

                                ഒടുവിലീയതിക്രമിച്ചു കടക്കലിനു
                                പിടികൂടി, മൂന്നാം മുറയും
                                നാലാം മുറയും നടത്തി
                                എന്നന്നേയ്ക്കും നാടുകടത്തും..

                                       


                             
                     
                             





                                 
                                  








                         

13 comments:

  1. കാലപരിധിയില്‍ ഈ അതിക്രമിച്ചു കയറ്റം അനിവാര്യമാണ്.
    അവസാനത്തെ നാലുവരി മനസ്സിലായില്ല.

    ReplyDelete
  2. നന്നായി, മാഷേ

    ReplyDelete
  3. ഒരു അപൂർണ്ണത തോന്നിക്കുന്നു. ഏതു തലത്തിൽ പിടികൂടി?

    ReplyDelete
  4. ഒരു പദം(കടക്കലിനു) ടൈപ്പിങ്ങിനിടെ
    വിട്ടു പോയതാണ്.

    ReplyDelete
  5. അങ്ങനെ വരട്ടെ. ഇപ്പോ തെളിഞ്ഞു..

    ReplyDelete
  6. പലതലങ്ങളില്‍ വായനതരുന്നുണ്ട് ഈ കവിത, സുന്ദരം

    ReplyDelete
  7. അതിക്രമിച്ചുകടക്കലിനുളള ശിക്ഷ അനുഭവിച്ചേ തീരൂ. അതു പ്രകൃതിനിയമം. നല്ല വരികള്‍ ,ആശംസകള്‍

    ReplyDelete
  8. ആദ്യം അമ്മയുടെ ഉദരത്തില്‍ പിന്നെ അച്ഛന്റെ ചിലവുകളില്‍ പിന്നെ കാമുകിയുടെ സ്വാതന്ത്ര്യത്തില്‍, ഭാര്യയുടെ സ്വകാര്യതയില്‍ പിന്നെ മക്കളുടെ ഇഷ്ടങ്ങളില്‍ ഒക്കെ അതിക്രമിച്ചു കയറി. അവസാനം മരണം അയാളെ നാടുകടത്താന്‍ പോകുന്നു.. ജീവിതം അതിക്രമിച്ചു കടക്കലാണെന്ന് ഓര്‍മ്മിപ്പിക്കുന്ന കവിത.
    വളരെ നന്നായിട്ടുണ്ട്. അഭിനന്ദനം.

    ReplyDelete
  9. അതിക്രമിച്ചു കടക്കുകയെന്നത് ജീവിതത്തിൽ അറിയാതെ സംഭവിക്കുന്ന ഒന്നല്ലെ ഒന്നിൽ നിന്നും മറ്റൊന്നിലേക്കുള്ള പ്രയാണം .... അതിനെ അതിക്രമിച്ച് കടക്കൽ എന്ന് നമ്മുടെ കാഴ്ചപ്പാടിൽ .. അനിവാര്യമായ ഒന്നു തന്നെ നാം അതിനെ തേടി പോയില്ലെങ്കിലും ....അതു നമ്മെ തേടിയെത്തും..മരണമായിട്ടെങ്കിലും ... നല്ല വരികൾ.. ആശംസകൾ..

    ReplyDelete
  10. കൊള്ളാം മാഷിന്‍റെ ഈ അതിക്രമം,നന്നായിരിയ്ക്കുന്നു.
    കവിത ഇടുമ്പോള്‍ ഒരു മെസ്സേജു തന്നാല്‍ ഒരുപാടു സന്തോഷം.

    ReplyDelete
  11. പിന്നല്ലാതെ, എത്രനാള്‍ സഹിക്കും :)
    കൊള്ളാം മഷേ, ഈ ജീവിത വീക്ഷണം

    ReplyDelete
  12. ഈ അതിക്രമം സഹിച്ച
    എല്ലാവര്‍ക്കും നന്ദി

    ReplyDelete

പിണക്കം

അരിയമലർകണ്ണുകളിൽ പരിഭവത്തെളിനീരുതിർന്നു വിറയാർന്നിടുന്നു നാസിക അധരങ്ങൾ കോണുകൾ തേടി മുഖം വെട്ടിത്തിരിച്ചു കമ്പിത ഗാത്ര, പിണക്കത്തിൻ ...