Friday, April 22, 2011

തുഞ്ചന്‍ പറമ്പിലൊരു ദിനം

ര്‍ഗ്ഗസീമകള്‍ക്കരികെ കല്പനാ
വൈഭവവാക് ശില്പ ശാലക്കുള്ളില്‍
പണ്ടു ചരിത്ര മണ്ഡപത്തില്‍ ദേവ
ഭാഷകളമൂല്യ വാക് ഭുഷകളാല്‍
നടനമാടിയ കേളീകീര്‍ത്തിയാല്‍
മൌലികളതുയര്‍ത്തിടും കാലത്തു
പാവമാരുംതിരിഞ്ഞൊന്നു നോക്കാത്ത
കൈരളിവരമൊഴിയാമവളെ കൈ-
പിടിച്ചു തുഞ്ചത്തെഴുത്തച്ഛന്‍ കൊണ്ടു
വന്ന വിശുദ്ധ ഭൂമികയില്‍ ഞാനെന്‍
പാഴ് പാദങ്ങളമര്‍ത്തിയെന്തിന്ദ്ര
ജാലമെന്നന്തരാത്മാവിലൂടപ്പോള്‍
ഒരു കാവ്യതരംഗം പാഞ്ഞൂ ക്ഷണം
പ്രഥമ മേഘ തീര്‍ത്ഥം പോലെയിരു
നീര്‍മണിയൂറിയ കണ്‍കളുമായി
കൂപ്പി ഞാനെന്നുടെ കരങ്ങള്‍ ഭാഷാ
പിതാവിന്‍ പാദം മനസ്സില്‍ സ്മരിച്ചും

കാലമെത്ര കടന്നു , എഴുത്തിന്റെ
ചരിത്രമെത്രയോ പുതുയുഗങ്ങള്‍ 
താണ്ടി നവനവങ്ങളാം ശാസ്ത്ര പാത
യിലൂടെത്തി ; ഇ എഴുത്തിന്‍ സൌകുമാ -
ര്യമണിഞ്ഞു വിളങ്ങി മലയാളം.
പൂര്‍വ്വസൂരികളെഴുത്തിന്‍ ദേവര്‍ഷി -
കള്‍ ചൊരിഞ്ഞൂ നന്മ , കീര്‍ത്തികള്‍ തുഞ്ചന്‍
പറമ്പിലെ ബൂലോക കൂട്ടായ്മയിതിനു .
ഏഷ്യയിലാഫ്രിക്കയില്‍ യൂറോപ്പില
മേരിക്കയിലോഷ്യാനയില്‍ തുഞ്ചന്റെ 
കാല്‍ച്ചിലമ്പണിഞ്ഞു മലയാള ഭാഷ
നൃത്തംച്ചെയ്യും വേദികയൊരുക്കിയോര്‍
ഞങ്ങള്‍ കൂടുന്നിവിടെയാചാര്യാ, പാടുന്നു
കിളിമകള്‍ ബ്ലോഗിന്‍ ലോക കീര്‍ത്തികള്‍ .


കൂട്ടായ്മയതു തുടങ്ങി പരിചയ-
പ്പെടുത്തലോ ; തൊട്ടു ഹൃദയങ്ങളില്‍
കണ്ടുമുട്ടിയിടയില്‍ പലരെ സൌഹൃ -
ദത്തിന്‍ പവിഴ മല്ലികകള്‍ പൂത്തു
പിന്നെ കണ്ണുടക്കി സര്‍ഗ്ഗഭൂഷക-
ളണിഞ്ഞ പ്രതിഭാ വരവര്‍ണ്ണിനികള്‍ .
അന്തിവെയിലെത്തി, യാത്രച്ചൊല്ലി ഞാന്‍
തുഞ്ചന്‍ കവാടം കടന്നു കൃതഹ-
സ്തനാമെന്നെയിന്നൊരു കവിയാക്കി
തീര്‍ത്തൊരു ബൂലോകമേ നന്ദി,നന്ദി.








Friday, April 15, 2011

കടലാസു കീറുകള്‍


                         എന്നെ അറിയുമോ ? , സഖീ
                         അന്നൊരു കൊടും ശൈത്യത്തില്‍
                         ഇത്തിരി കനലിനായി
                         നിന്നന്തികത്തിങ്കലണഞ്ഞതും ,
                         വിറയാര്‍ന്ന കൈയാല്‍
                         നിന്നെ തൊട്ടു വിളിച്ചതും,
                         തണുത്തുറഞ്ഞൊരെന്‍
                         രക്തധമനിയിലഗ്നി ജ്വാല 
                         നീ പകര്‍ന്നു തന്നതും ;
                         പിന്നെത്രയോ ശിശിരങ്ങളില്‍
                         ചൂടുതേടി നിന്‍ കൂടണഞ്ഞതും ,
                         എരിയുന്ന ചന്ദനത്തിരി
                         സുഗന്ധം , നൂപുരശിഞ്ജിത -
                         ങ്ങളുജ്ജ്വല വര്‍ണ്ണവസ -
                         നങ്ങളുതിരും  യാമങ്ങള്‍.

                        എന്നെയറിയുമോ ?
                        ചുട്ടുപ്പൊള്ളും വേനലില്‍
                        നിന്നരികിലണഞ്ഞു
                        മഞ്ഞുകണങ്ങള്‍
                        തേടിയതും , വറ്റിവരണ്ട
                        നാവാലിടറിയന്നു നിന്‍
                        പേരു ഞാന്‍ പുലമ്പിയതും
                        രാഗമുന്തിരിച്ചക്ഷക -
                        മേകിയെന്നുടെ ദാഹമന്നു
                        നീ , തീര്‍ത്തതും , പിന്നെത്രയോ
                        ഗ്രീഷ്മങ്ങളില്‍ ; സന്ധ്യകളന്നു
                        നൃത്തനൃത്യ സംഗീത സാന്ദ്ര -
                        ങ്ങള്‍ ,കലകളുടെ സംഗമങ്ങള്‍ .

                        എന്നെ അറിയുമോ ? സഖീ
                        വിളിപ്പാടകലെയലയും
                        ഓര്‍മ്മകളില്‍ തിരയൂ ,
                        ഇല്ല ! പരിചിത മന്ദഹാസം
                        ഇല്ല ഹൃത്തിലാഹ്ലാദവീചികള്‍

                       ചൂണ്ടുവിരല്‍ നീട്ടുന്നു , നീ
                       കണ്ടു ഞാന്‍ കടലാസു ചീന്തു -
                       കള്‍ നിറഞ്ഞൊരാ , കൂട ;
                       ആത്മപരിചിതങ്ങളാം
                       അക്ഷരങ്ങള്‍ മൃത്യുപുല്കിയ ,
                       കടലാസു കീറുകള്‍ .
               

                                  കടലാസുകീറുകള്‍-കവിതാസമാഹാരം
                                                     പെന്‍ബുക്സ് 2005

                  ഈ കവിത നേരത്തെ പോസ്റ്റു ചെയ്തതാണു്.
അബദ്ധവശാല്‍ ഡീലിറ്റു ചെയ്തു പോയി. കുറച്ചു സുഹൃത്തുക്കള്‍
അഭിപ്രായം കുറിച്ചിരുന്നു











പിണക്കം

അരിയമലർകണ്ണുകളിൽ പരിഭവത്തെളിനീരുതിർന്നു വിറയാർന്നിടുന്നു നാസിക അധരങ്ങൾ കോണുകൾ തേടി മുഖം വെട്ടിത്തിരിച്ചു കമ്പിത ഗാത്ര, പിണക്കത്തിൻ ...